華麗一族之三

萬俵家族坐擁阪神集團，核心業務為板神特殊製鋼、板神銀行，但風光背後，萬俵家族魍魅重重。
集團創辦人萬俵敬介從來無喺故事入面出現，但就對故事中人影响極深；甚至就係導致萬俵大介、鐵平父子不和嘅主因。
整個故事核心就係從來無出場嘅萬俵敬介；萬俵敬介嘅影子籠罩住整套劇。
根據故事中人嘅憶述推斷：萬俵敬介係一個風流男人。佢同情婦發生關係，生左個私生女；又曾經同大介嘅太太寧子親密接觸，以致大介懷疑兩人有不倫關係。「外表體面但心胸狹窄嘅萬俵大介」無法忍受呢一個可能，於是佢搵左高須相子做管家兼情人。
萬俵鐵平「最尊重嘅唔係父親大介，而係祖父敬介」。處事作風有祖父嘅影子，甚至係如出一轍。
而萬俵大介憎恨嘅，正正就係敬介。因為呢一點，佢視鐵平為眼中釘亦係自然而然嘅事。
而故事嘅其中一條主綫就係由大介嘅心結展開，一步步演化都父子對決嘅局面。
因為冇睇到原著小說，呢一篇就係華麗一族評介嘅終結篇。
其他評介：
評論 ～ 華麗一族
華麗的蒼涼──評《華麗一族》
更多資料：華麗一族- Wikipedia。
Posted by kRiZ cPEc

閱讀全文»

華麗一族之二

華麗一族另一個主題係三雲總裁同萬俵總裁之間嘅對比。
一開始，三雲總裁對鐵平嘅發展計劃就傾力支持認為支持有理想嘅企業係銀行家嘅責任；相比之下，萬俵大介更重視自己間銀行喺金融重組中嘅生存機會，因為總裁有責任保障公司職員嘅生計。
亦即三雲、萬俵對銀行家職責嘅理解截然不同。因為呢一點分別，講魄力，三雲總裁睇起來勝過萬俵大介嘅小心謹慎、步步為營。
但問題在於，一間銀行假如要安然渡過金融改革的話，會需要一個有魄力、願意冒險嘅總裁、定係一個力圖保障銀行生存嘅總裁？銀行存款額嘅多少，對故事中嘅銀行而言，係生死存亡嘅大事。而阪神銀行嘅存款額喺十二間都市銀行入面只係排第十，要避過大銀行併吞，就必需要增加總存款額。任何會導致損失嘅風險對阪神銀行都係無法承擔：「即使只有1%嘅風險，都應該仔細考慮」。
而三雲嘅大同銀行嘅存款額排第五，金融重組嘅威脅比較少。所以三雲有足夠資本去成為一個有魄力嘅銀行家。假如轉換角色的話，三雲亦可能會係一個保守嘅總裁。
銀行畢竟係一門生意，總會有守業、進取等唔同嘅階段。三雲、萬俵各自嘅銀行就分別處於開拓同守業嘅階段。立足點唔同，處理風險、危機嘅方法自然唔會一樣。
於是就出現左兩個銀行家對立嘅局面。
Posted by kRiZ cPEc

閱讀全文»

華麗一族

睇完華麗一族嘅最後一集，覺得其中一個主題係命運嘅播弄。因為血型檢定結果有錯，銀行總裁萬俵大介就一直懷疑自己嘅大仔鐵平唔係自己親生。直至人死之後見到驗屍報告，先至發現係一個誤會。
鐵平生前希望將煉鋼工塲發揚光大，結果因為大介嘅心結、再加上日本金融架構重整，規模細嘅銀行隨時要被大行併吞，對鐵平經濟上嘅援助相當有保留。甚至希望促成鐵平嘅公司破產，從而達成以小吃大嘅自保策略。
最後鐵平公司因為一次嚴重工業意外而被勒令停產，其後再被融資銀行要求債務重整。
鐵平認為大介蓄意令煉工僘破產，於是向萬俵大介提出訴訟，但債權人接收煉鋼廠之後即時撤銷訴訟，並將所有原公司高層開除。
一無所有嘅鐵平將自己煉鋼嘅研究心得交低之後，一個人走入深山，自殺。
而大介發現自己一直以來誤會左鐵平之後，打算幫鐵平實現生前嘅願望。只係佢幾經辛苦、不計代價達成合併而成立嘅新銀行，已經被鎖定為下一次銀行合併嘅對象，佢嘅新銀行根本唔會有將來。
Posted by kRiZ cPEc

閱讀全文»