睇完最後的貴族，再睇伶人往事，心諗：作者搜集同整理資料應該用左唔少時間，讀完至少要喺仲有印象嘅時候做個筆記先至算係冇白睇。但內容咁多，要寫好份筆記都真係有啲難度。
兩本都係以人為經、紅色政權建國之後大事為緯。一本書為尚小雲、葉盛蘭、程硯秋、楊寶忠等人立傳，亦紀錄左中國戲曲–京劇衰落嘅原因。新不如舊、今不如昔嘅想法，貫穿全書；另外一本就紀錄左章伯鈞、儲安平等知識份子喺1957年嘅反右運動以及1966年開始嘅十年文革期間嘅經歷。
中共掌權之後，推行戲曲改革，但實質上係思想審查—同中共管治理念、核心思想有出入嘅劇目，再動人再好都要禁演。可以表演嘅劇目因此銳減，直接結果係伶人失業、大部份劇目{幾近 }失傳。
於是我記起以下文字—
二十世紀五十年代是京劇空前繁榮的時代，當時舞臺上人才輩出，流派紛呈。但“文化大革命”的洗劫，造成了京劇演員、劇碼、觀眾三斷檔之局。過去老藝術家的演出只留下很少影像，但卻保存了不少錄音。
《中國京劇音配像精粹》由前全國政協主席李瑞環策劃。李主席早在擔任天津市市長時就提出過用音配像的辦法搶救瀕臨失傳的京劇經典劇作，以確保京劇藝術得以世代留傳。1994年，他委託已故京劇藝術大師張君秋先生操辦此事，並開列以下各項要求：
一、 要把歷代名家的演出錄音，凡能收集到的全部錄影；
二、 先易後難，重在搶救，儘早和觀眾見面；
三、 講合作、講奉獻，一切為了京劇藝術的流傳和振興。
這項工程是聲、像、傳統文化與高新技術的完美結合，是為繼承京劇藝術而誕生的一種藝術創作形式，更是前所未有的創造、弘揚民族文化的盛舉。
雖然不失為一項補救措施，但有幾多人會睇呢一套光碟？
而五四以來留學西方嘅知識份子，難得之處係有獨立思想、人格，有自己嘅見解。但一連串嘅政治運動，思想改造，結果死嘅死、失蹤嘅失蹤、自殺嘅自殺；再唔係就放棄自己嘅道德底線，揭發、批鬥自己昔日嘅朋友。
為求生存、自保，人有乜野做唔出？一連串嘅政治運動，中國一整代嘅人變成野獸。老毛嘅社會改革實驗証明一個真理：絕大部份人嘅人格都係不堪一擊。
