文章大忌

記得以前讀過柏楊版資治通鑑，有一段講到一個外族領袖宇文逸豆歸對慕容翰嘅名氣引以為忌。於是即使對方走難都唔幫忙。文章係咁寫嘅：「宇文部落的酋長宇文逸豆歸忌恨慕容翰的才幹和盛大的名望…」
之後睇兩晉演義，讀到同一件事，佢嘅寫法係：「宇文部酋逸豆歸，忌翰才名…」
由十一個字拉長到二十六個字，印象深刻—相比之下，柏楊版資治通鑑雖然係詳細，但就有啲長得過份。後來就覺得，呢一重語譯功夫根本唔需要做—文貴簡練，原文意思其實都夠清楚，將佢擴充本身已經係多此一舉；再加埋啲唔應該加嘅形容詞就令到文句讀起黎更加冗長。格弱字冗，莫此為甚。
其實中文要寫得好，真係要練出黎—
雲對雨，雪對風，晚照對晴空。來鴻對去燕，宿鳥對鳴蟲。
三尺劍，六鈞弓，嶺北對江東。人間清暑殿，天上廣寒宮。
夾岸曉煙楊柳綠，滿園春雨杏花紅。
兩鬢風霜途次早行之客；一蓑煙雨溪邊晚釣之翁。
之前讀董橋嘅散文，其中一篇引左上面呢段文字，讀完都覺得真係好有意境。
今日上網抄返出來貼喺度，等將來可以隨時睇返。

閱讀全文»

唔寫blog嘅理由

好耐冇寫呢個blog。
無聊，就數吓唔寫blog要乜野理由。
一‧忙：
忙住睇其他人寫嘅blog。
忙住睇書。
忙公司嘅野。
二‧唔寫：
唔知應唔應該寫嘅，唔寫；
太私人嘅事，唔寫；
唔想寫嘅，自然唔會寫。
一輪篩選之後，往往已經唔知有乜野可以寫。
唔知有乜野可以寫。
唔知有乜野我想寫。
冇時間寫、冇心情寫，大條道理唔寫。
到今日先至明白，一個有內容嘅blog唔應該剩係得日記。雖然對於一個blog寫成啲對一個人嘅事業發展有影響呢個講法有保留，但如果能夠將寫blog睇成一種思考訓練，對事業、應對可能真係會有意想不到嘅效果。

閱讀全文»

筆記

聽李天命講書嘅CD，講因果命運，第一次聽，瞓著；第二次，最後都係瞓著，唉。「一舊石頭喺高處跌落地，佢可能覺得自己自由，喺度飛緊。但唔會諗到自己受制於地心吸力；一個囚犯，乘機逃走，但假設有一過心理學家對佢瞭如指掌，知道佢喺條件a+b+c出現嘅時候就會越獄，越獄之後嘅逃走路線由條件d,e,f決定，而佢去度一個位置就會笑三聲或者喺另一個位笑四聲…人嘅自由意志可能亦都只係一種錯覺，一切可能係喺一個更高能量嘅意料、掌握之中」
「一個杯之所以係一個杯，係因為有各種充分條件，當呢啲條件唔再成立，杯就唔再存在」
http://leetm.mingpao.com/htm/article_5a.htm
* * *
有時睇番自己以前寫嘅日記、作嘅故事，感覺就好似嗰啲係另一個人寫嘅。有一段時間，寫日記，之後每隔一段時間就會撳delete，因為嗰啲紀錄，喺事後睇番嘅感覺只有一個：難堪。於是每隔一段時間，我就會刪除自己過去留低嘅紀錄。
* * *
一個人之所以成為今日嘅佢，成長背景係其中一過最有影響力嘅因素，其次就係佢身邊嘅家人嘅性格、行為同佢自己嘅經驗。一個屋企只能可以用狗竇形容，屋企人老套、不識大體、三日可以嘈十次、事後各自埋怨、訴苦；而且又窮又無選擇嘅人，如果再加埋一啲負面經歷，咁佢想諗野唔負面，唔挑剔其他人，唔自卑，都幾難。
* * *
上半生被父母毁掉，下半生呢？(the first half of my life ruined by my parents, the second half by my children?)

閱讀全文»

Negotiator

星期日去影相同行街，返到屋企，唔想睇波、又唔想睇廣告頒獎禮，於是轉睇國際台。
播緊冇數講，一套美國戲，有我好討厭嘅美國南部口音。但Matrix reloaded要10點先播，無辦法唯有繼續睇。睇落發覺套戲唔錯、好有張力。最後我一直睇都結局，之後先再轉返明珠台，睇埋播左一半有多嘅Matrix，同一晚睇兩齣好戲，真好。

閱讀全文»